കൊച്ചി: മകനെ തിരഞ്ഞെത്തിയ പോലീസ് മർദിച്ചെന്ന് വീട്ടമ്മയുടെ പരാതി. രോഗബാധിതയായ വീട്ടമ്മയെ പോലീസ് പിടിച്ചു തള്ളിയെന്നാണ് ആരോപണം.
മകനെ കസ്റ്റഡിയിലെടുക്കണമെന്ന് ആവശ്യപ്പെട്ടപ്പോഴാണ് അമ്മ പ്രതിരോധിച്ചത്. വടക്കൻ പറവൂരിൽ ഞാറപ്പടി സ്വദേശിനിയായ സെൽമയും മകളും ചികിത്സ തേടി. സംഘത്തിൽ വനിതാ പോലീസ് ഉണ്ടായിരുന്നില്ലെന്നും കുടുംബം ആരോപിച്ചു.
വീട്ടിൽ ലഹരി മരുന്ന് ഉണ്ടെന്ന രഹസ്യ വിവരത്തിന്‍റെ അടിസ്ഥാനത്തിലായിരുന്നു പോലീസ് എത്തിയത്. പറവൂർ സിഐയുടെ നേതൃത്വത്തിലാണ് പോലീസ് സംഘമെത്തിയത്.
എന്നാൽ വീട്ടിൽ നിന്ന് ലഹരി മരുന്ന് ഒന്നും കണ്ടെത്തിയില്ല. തെളിവുണ്ടെന്നും മകനെ കസ്റ്റഡിയിലെടുക്കണമെന്നും ആവശ്യപ്പെട്ടപ്പോഴാണ് അമ്മ ഇടപെട്ട് തടയാൻ ശ്രമിച്ചത്.
ഈ സമയത്ത് അമ്മയ്ക്ക് മർദനമേറ്റെന്നാണ് കുടുംബം പറയുന്നത്. സെൽമയുടെ മകൻ സജിലിനെ പോലീസ് കസ്റ്റഡിയിലെടുത്തു. അതേസമയം മർദിച്ചിട്ടില്ലെന്ന് വടക്കൻ പറവൂർ പോലീസ് വ്യക്തമാക്കി.
